Sunday

خلص الخبز

كلما بنزل عالبلد بوقف بأوروبا

يا بأمستردام، يا بروما، أو لندن

وقبل ما أطلع بالطيارة لسورية

لازم إقرا قل أعوذ برب الفلق

من شر ما خلق

بستعوذ ميت ألف مرة

وباخد حبة منوم وبطلع

بحس الطيارة عم تعن من كتر الشناتي

شناتي تحت و شناتي فوق

شناتي بالخزاين و شناتي بين الرجلين

حتى والله أعلم شفت كم شنتايه مربطة عالأجنحة

كللو بدو هدايا من بلاد برة

خلصنا من الشناتي

آخ من الولاد

كل واحد ووحدة معهن عالأقل ٤ أو ٥ ولاد

الظاهر في خطة سرية لزيادة التمثيل السوري في المهجر

يعني ما بيكفي الطوابيراللي على بواب السفارات؟

طبعآ لأ..لا بد أنو نأسس جيل سوري ولدان بالمهجر

يحكي إنكليزي بدون لكنة accent

مشان نفهم أكتر عالغرب و يفهمونا بقا

والجيل.. و ما أدراك ما هذا الجيل

جيل صراخ وبكي بيطير المخ

من شهرين لما نزلت كان عالطيارة واحدة سورية

بنت حلال معها أربع ولاد وكم شخص من عيلتها

لا تسألني كيف.. بس الأربعة أعمارون يمكن تحت السنتين

يمكن ما بتحبل إلا دبل كل مرة

المهم.. إجا حظي بالقرعة بالصف اللي جنبها

وعيلتها موزعة حواليي

عاليمين و اليسار..من ورايي و قدامي

قامت وزعت الولاد عليهن وخليت معها بنت

ماشاءالله شكلا متل الملاءكة هالقطة

وأول ماسكرو باب الطيارة و بدت تتحرك

بدا الصراخ والعياط والولاويل

الملاك اللي جنبي طلعت عميل سري

لكل شياطين الأرض و السما

هي بتغني وأخواتها بيردو

والأم توقف وتفك الحزام والمضيفة تصرخ بالإنكليزي

For the last time, please sit down and fasten your seatbelt

أغاني أم كلتوم أقصر من غنية هال الأربعة

بس أخيرآ سكتو ونامو

والله نوم الظالم عبادة

أخدت حبة وجع، حاولت نام، ما قدرت

إجا الأكل.. جاج أو معكرونة مع سلطة و كيك و قطعة خبز

أكلت بالمطار بس أد مانتفض بدني جعت

بنص الأكل لقيت المضيفات عم يركضو من مقعد لمقعد

كللو بدو أكل كمان و أهم شي الخبز

يمكن هي جزء من خطة سرية تانية كمان

ناكل كلشي عالطيارات الأجنبية

بركي بيفلسو وبيزيد شغل الطيارات الوطنية

و بيقولو مافي عنا تخطيط!!!

المسكينة المضيفة بالأخير حملت صينية الخبز الفاضية

و رفعتها أدام كل الزباين و أعلنت

No more food, and definitely no more bread

رجعت الملاك اللي جنبي تصرخ هي و إخواتها

وبديت أنا إصرخ

ولي... شو خلص الخبز؟

No comments: