Saturday

ضجران

أعد مع موظفاتي بهالشغل
عم بعمل حساباتي
وجعوني عيوني من البحلقة
بالأرقام و إيميلاتي

اتطلعت لبرة.... الشارع حلو
و الجنينة اللي عليه أحلى
طيب يا مصروع روح تمشى بهالجنينة
إنت وشي واحدة كحلى؟

ما بدي. والله مابدي
بدي روح عالشام
شم الدخان
وبحلق بالنسوان
جمال و أنوثة بس بيلبسوا ألوان بتقرف
شو صار للذوق ببلدنا؟ شي بيخوف
كل شي بيلبسوه ممعوط و ملون
والشباب كمان أضرط و ألعن
جينز ديق
و قمصان أديق
و بيهزو أفاهن أكتر من النسوان
روحوا شوفوهون بالشعلان


ومع هيك لسه بدي إرجع

بدي روح شم ريحة المخلل والزيتون

والشاورما والفلافل والليمون

بدي إتخانق مع شوفير سوزوكي
وآكل أتلة بقضيب
بدي إطلع على سوق الجمعة
و إشتري كروز دخان تهريب

بدي فك حزام الأمان
وخللي الشرطي يوقفني بالصالحية
أعمل حالي مابحكي عربي
وفرجيه شهادتي الأميركية

بدي إتجوز عالعتمة

الكهربا مقطوعة ولو طلعت مرتي عورة

ولما بتنقطع المي

بدي إتحمم بنهر تورة

بدي إرجع...بدي إرجع

2 comments:

Anonymous said...

شكلك كتير مشتاق للرجعة..
احييك على شعورك الوطني..
:)

أنا سوري said...

شكرآ إلك. شوقي بالحقيقة هو للأهل والأصدقاء و المجتمع أكتر من الشوق للمكان نفسه. أمريكا كبلد جميلة لأقصى الحدود لكن التقاليد سيئة جدآ. العادات والتقاليد بعيدة جدآ عن ما ربيت عليه في الوطن. شكرآ لزيارتك.