Sunday

يا حنونتي

رجعت من البلد من فترة بعد زيارة قصيرة

تقبّلت التعازي بإمّي وزرت قبرها

كل يوم بالليل إقعد لوحدي وإبكي

كانت تصحا كل ماتسمع صوتي وتسألني إذا بدّي شي

حتّى وهيّ بعز المرض

ليوم اللي سافرت كانت ماتنام الليل إذا كنت مرضان

ماعد إسمع كلمة الله يرضى عليك

ولا حدا بيفيق الصبح ويصلّي ويقرالي سورة الواقعة مشان الرزقة

ياترى عم بارثيكي ولّلا عم برثي حالي ياحنونتي

ياترى المائكة اللي عيّنتهون لحمايتي لسّا شغّالين وللا أضربوا؟

كل يوم باتصل بالبيت، مافي جواب، لا حياة لمن تنادي

عم باستنّى معجزة ... بركي بترد عالتليفون وتصرخ من الفرح كلما كانت تسمع صوتي

حبّك وحنانك إمتد من الشام علي مدى الأرض والبحار لأمريكا

لمّا ودّعتك ودّعت حبي للحياة اللي بعرفها

ودّعت عيلتي وبلدي وأهلي و كل أحبابي

اللي كانو عايشين معي بحياتك واختفو لمّا رحلتي وتركتيني

بكرة بيجي سخيف بيقللي حاجتك... إنسا وعيش حياتك

بتأسّف إنو ماعرف متل حنانك وحبّك

بيتنا تسكّر وهجرته الحياة، حتّى الزرع الي زرعتيه مات

بس الغريب إنّي بسمعك عمتحاكيني كل يوم

كلمة الأرض والسما ترضى عليك بسمعها كل يوم

إشتقتلّك ياإمي، قد ماكنت مشتاقتيلي بحياتك

بيبقى كلمة واحدة بدي قللك ياها

أنا آسف ياحنونتي

آسف على كل شي طلبتيه مني ومالبيتو

آسف على كسر خاطرك بتغرّبي

ياحنونتي

9 comments:

abufares said...

أتفهم كل كلمة كتبتها فمن فقد أمه فقد نصف الدنيا إن لم يكن أكثر
لن تخفف الأيام من حجم الخسارة لكن الذكريات الجميلة سوف تتسلل تدريججياً لتمتزج الدموع بالإبتسامة
وتبقى الأم وتبقى أنت صغيرها

أنا سوري said...

أهلين أبو فارس. شكراً لك وإنت بتعرف شو اللي عم مر فيه لأنك كنت كمان قريب لوالدتك الله يرحمها. كلناعلى هالطريق عاجلاً أم آجلاً. أنا آسف ماعدطلعت عالنت ولازرت. ماعندي نفس للكتابة أو القراءة والله والمشاغل أكتر مما تصوّر. بس إنشالله برجع عن قريب. ممنونك

Anonymous said...

انت شغلتك بس اتبكيني كل ما فتت لمدونتك؟

الله يرحم امك ويوفقك برضاها عليك

رواد

fatima94 said...

مو معئول مو معئول كلماتك طلعت من القلب ووصلت لجوات القلب والله دموعي صارو ينزلو غصب عني ..مابعرف شو بدي ئلك الله يرحم إمك والله يوفقك ويسعدك دنياو آخرة
تقبل مرورالأول ويلي كان بالصدفة ومن هون ورايح رح يكون متواصل ...بإذن الله
شكرا لإبداعك

fa6ima

abufares said...

Ana Sourie

Please post something and tell us you're OK. Rawad left a comment on my blog asking about you.
We would all love to read your words filled with hope again.

أمل said...

ده ايه الموقع التحفه ده

لكم منى اجمل تية

كاميلا said...

الكلام حقيقى حلو أوى ومؤثر جدا .. أحييك على أسلوبك الرائع وعلى الموقع الممتاز .

أنا سوري said...

Thank you all for your comments and concers. I just needed some time off. I hope thing will get better back home. I'm ok Abu Fares. I appreciate your concern. I hope you are well too.

زنابق وحرائق said...

الله يرحمها ويجعل مثواها الجنة والله كلماتك حرقت قلبي من جوا وخليتني اتصور حالي مكانك ولي والله الواحد بدون أم ما بيسوى شي الله يصبرك ويحميك ويخلي لكل القراء أمهاتهم ويرحمنا ويرحم جميع أمواتنا وأمواتكم.......